“ЭРҮҮЛ ДЭЛХИЙН ТӨЛӨӨ ИРЭЭДҮЙГЭЭ ХАЙРЛАЖ НЭГ ЦАГ ГЭРЛЭЭ УНТРААЦГААЯ”


Өнгөрсөн хагас сайн өдөр буюу 2017 оны 3 сарын 25-ны өдөр дэлхий нийтээр "Эх дэлхийн цаг" -ийг тэмдэглэн өнгөрөөлөө. 

2007 онд Австралийн Сидней хотын 2.2 сая айл өрх, албан байгууллагаас эхэлсэн энэхүү хөдөлгөөн өдгөө дэлхийн 7000 хотыг хамарсан эх дэлхийн өдөр болтлоо өргөжиж чаджээ.

Дэлхийн бүх хүмүүсийг нэг цагийн турш гэрэл болон цахилгаан хэрэгслээ унтраахыг уриалан үүгээрээ эрчим хүчний үйлдвэрлэлээс гарах хүлэмжийн хийн ялгарлыг бууруулах, дэлхийн дулаарал, уур амьсгалын өөрчлөлттэй тэмцэхэд хүн бүрийн оролцоо чухал юм гэдэг утга санааг илэрхийлсэн хөтөлбөрийг Дэлхийн байгаль хамгаалах сан /WWF/-аас санаачлан хэрэгжүүлж олон нийтийг нэгдэхийг уриалсаар ирсэн.

Энэ жилийн "Эх дэлхийн цаг"-ийн кампанит ажлыг Байгаль Орчин Аялал Жуулчлалын яам санаачлан 2017 оны 3 дугаар сарын 25-ны өдөр 20.30 цагаас 21.30 цагийн хооронд Сүхбаатарын талбай дээр "Лаатай үдэш" нэрийн дор тэмдэглэн өнгөрүүллээ. 

"Эх дэлхийн цаг"-ийн гол зорилго нь гэрэл унтрааж цахилгаан хэмнэхдээ бус уур амьсгалын өөрчлөлттэй тэмцэх, эх дэлхийгээ авран хамгаалахад хүн бүрийн оролцоо чухал гэдэгт олон нийтийн анхаарлыг хандуулахад оршино.

2010 онд Дэлхийн байгаль хамгаалах сангийн Монгол дах хөтөлбөрийн газрын санаачлагаар энэ хөдөлгөөнд нэгдэн орж Улаанбаатар хот, Ховд, Говь-Алтай, Увс, Хэнтий аймгуудад зохион байгуулсан бөгөөд дэмжигчдийн тоо жил ирэх тусам нэмэгдсээр байна.

Энэ жилийн арга хэмжээнд их, дээд сургуулиудийн оюутан залуус нийлсэн 500 гаруй хүмүүс нэгдлээ. 

Арга хэмжээний талаарх мэдээллийг EARTH HOUR MONGOLIA фэйсбүүк хуудсанд нэгдэн авна уу.

https://www.facebook.com/Earth-Hour-Mongolia-695466960633634/?notif_t=page_admin&notif_id=1490078116633638

Бэлгэдлийн тайлбар

Лаа асаах нь "Эх дэлхийн цаг"-ийн гол үйл ажиллагааны чухал илэрхийлэл бөгөөд энэ нь гэрлээ унтраасан үеийн орчны гэрэлтүүлэг болохоос гадна асаасан лаа нь итгэл найдвар, эерэг бүхнийг урин дуудаж, гэрэл гэгээтэй ирээдүйг бэлгэдсэн утга агуулгатай.

60+ хэмээх бэлгэдэл нь өдөр тутмын амьдралдаа эх дэлхийгээ хайрлан гамнасан алхам хийх болно гэсэн хүмүүсийн эв нэгдлийг илэрхийлдэг. 60 гэдэг тоо нь 60 минутыг илэрхийлж байгаа бол + тэмдэг нь 60 минутын үйлс цаашид нэмэн дэлгэрэх болно гэдэг утгыг агуулж байгаа билээ.

Нийтэлсэн огноо: 2017-03-28 01:53:21

Сэтгэгдэл